Les mênoms

Y'avait eune tendance lé temps pâssé dé connaître toute eune fanmille par un nom tchi n'tait pon un nom d'fanmile. Par exempl'ye, un vièr St. Ouënnais tchi louit man Clios d'Jacques pour bein d's années 'tait connu comme Maît' Ph'lippot Vibèrt. "Cap'taine" Ch'tait probabliément viyant qu'iun d'ses anchêtres 'tait Cap'taine dé navithe et tch'il avait ieu tchique aventuthe tchi li'avait donné un cèrtain "cachet", parmi ses vaîthîns et anmîns, et qué le nom avait suivi d'pétdhe en fis dans sa fanmile.

Lé nom "Ph'lippot", sans doutge, est philippe officiellemente. D'autres dé chu nom-là, sustout les jannes qué lus p'pèe avant nom Ph'lippe, 'étaient tchiquefais appelés Philot, Philosse ou Philinne comme mousses, et i' continuaient à êt' appelés d'mème lé restant d'lus jours. Dans les vièrs r'gistres d'bâtème, nou trouve lé nom "féminîsé", et nous vais eune fille bâptisie auve lé nom dé "Philipine".

Nou n'pensait pon à donner des noms en Angliais ès êfants dans les viérs temps, et l'grand des garçons avait quâsi tréjous l'nom d'san péthe. Dans chu cas-là, si l'péthe avait nom Édouard (rap'tichi à Douard), il' appelaient l'janne Douard "Dardot", Dardinne ou Darrique, et quand j'tais mouse y'avait un Dardinne Lé Cornu, et un Darrique Lé Cornu étout. I' d'meuthaient es Landes. Darrique démeuthait au Pallion, pas bein liain d'la forge.