Nouos Anciens 'taient Naviguants

Papa et trais d'ses fréthes , Jean, Charles et Françouais,touos nés entre 1828 et 1845, 'étaient tous `à La Côte en mème temps. Comme j'vouos l'dîsais, Papa restit en Jèrri eune fais mathié et suivit sa vocâtion d'forgeu. Charles s'en r'vint en Jèrri prendre soin d'sa m'mée (Élisabeth Le Brun 1806-1895 et du mênage quand son p'pée Jean Thomas (1804-1973) mouothi. Fut tué accidentellement houors pays.

J'aimais bein vaie man grand oncl'ye Charles v'nîn passer la séthée siez Papa à La forge.  I' v'nait atout sa lantèrne sa c'mînse de molleton et san chapé d'feûtre amathé l'tou d'san co atout un but d'ficelle. L's anciens, en général, né vivaient pon si vièrs comme dé nouos jours, ouaithe tch'i y'en avait tréjours techitch'un tchi touchaient la nénantaine, mais si i 'pathaissaient vièrs viyant tch'i' gardaient lus barbes et Papa et m'n oncl'ye Charles en 'taient du nombre. Dans chu temps-là, il' appréchaient d'la souoxantaine — mis nou lus en éthait donné huiptdante à les vraie d'mème au jour d'aniet.  

Ayant navidgi et connu La Côte et Tèrreneuve touos les deux, lus convèrsâtion 'tait tréjous entouôrre la vie en mé et lus aventuthesà bord des navithes (à vailes dans chu temps-là), d's anmîns pèrdus dans les nâufrages, et d'la vie sus les runs des Robîns. Fruïngs et Boutillièrs à La Côte.

I' pouvaient vouos dithe combein d'jours qué les grads navithes — lé Patruus, lé C.R.S., la Fanny Breslauer, lé Dawn, et i' connaîssaient l'caractéthe dé touos les cap'taines et le générôsité ou l'avarice des bourgeais. Combein d'fais qu'j'ai ouï papa dithe qué quand les navithes avaient d'mauvais temps et d'vents contraithes au large en c'mîn pour Tèrreneuve ou La Côte dans l'hiver, et qué l'viage duthait bein pus longtemps qu'd'habitude, i' v'enaient à court dé mangi et qu'les morcieaux d'lard dans l'fond du saleux y'avaient 'té si longtemps qu' y 'avait des magots d'dans! Ch'tait fascinnant d'les ouï et nou s'assiévait trantchil'ment à l's êcouter. À ch't  êpoque-là les mousses savaient bein qué ch'tait malpoli d'înterrompre la convèrsâtion d's anciens! Papa avait 'té l'long d'la côte d'Irlande et, auve ses compagnons d'naûfrage, i' restit parmi l's Irlandais pour eune bouanne volée devant qu'un aut' navithe vînsse les ramâsser. L's Irlandais fûdrent hospitalièrs mais il' 'taient pauvres et vivaient hardi sus des patates.