En viage pour La Côte

On tait au mais d'Avri 1901 qué p'pèe et M'mèe lus enfûrdent à La Côte. Quand P'pèe s'décidit d'y aller, Papa dît à Manman: "J'dév'thions prendre iun des garçons. Ch'est liain à s'en aller dans un navithe à vailes, et ouaithe qué, j'ai fait l'viage mé-mème bein des fais en seûtheté, nous n'sait janmais tch'est tch'i' peut s'arriver.  En cas d'avârie,  y en éthait tréjours iun d'prêservé, et i' gardéthait compangnie au  George". I, décidîdrent qué man fréthe Fraînque restéthait. Nouos fréthes Sydney George et John Giffard lus enfûdrent à La Côte auve nous pathents dans la brigue "Dawn" dé 168 tonnieaux.

J'allînmes sus la caûchie deux jours dé siette, Papa et Manman et Fraînque et mé, pour les vrai sorti, mais l'vent n's'adonnait pon ches deux fais-là et l'navithe restit dans la caûchie. I' fîdrent vaile lé traisième jour — et jé n'tions pon là! Dé nouot' fénêtre d'chambre à La Forge, j'vînmes lé navire pâsser La Corbiéthe et j'restînmes à lé r'garder, l'tchoeu gros, jusquà pèrte d'veue.

Un plus grand navithe, j'pense qué ch'tait l' C.R.C., sortie en mème temps qué l'Dawn et san Cap'taine dît au Cap'taine du Dawn "ou m'vèrrez à vouos attendre à Paspédgia!" Mais l'Dawn fît l'pâssage dans 26 jours et arrivit là longtemps d'vant l'autre.

J'né r'vis janmais man p'pèe. I' mouothis en 1907 au Cannada à la siette d'un accident. Jé r'vînmes nouos fréthes Sydney et John, soudards dans l'armée Cannadgienne à la Grand' dgèrre dé 1914-1918 quand j'tions nous-mèmes soudards, Fraînque et mé, dans l'armée Angliaîche, et j'fînmes un compliot auve ieux qué si j'avions la chance dé vivre l'travèrs d'la dgèrre j'nouos en îtchions au Cannada pour vraie M'mèe et r'rêuni la fanmile. Lé Bouan Dgieu nouos pèrmînt dé r'vénîn d'la dgèrre sains et saufs touos les quatre, et j'nouos en feûmes à Ottawa, Fraînque et  mé, en Novembre 1919 dans l'grand stînme "Empress of France" dé la Compangnie Cannadgienne-Pacifique.  J'eûnmes un rude pâssage, mais les mînséthes dé la dgèrre et du pâssage fûdrent oubliées dans la jouaie d'èrvaie M'mèe et nouos fréthes Sydney et John et d'vair  nouos fréthes Percy et Jim et nouos soeurs Emily et Elsie tch'avaient 'té nés au Cannada.

À ch't heu, j'sommes siez fréthes et eune soeu en Améthique (Elsie mouothit y'a un an au Cannada). Ouaitdhe qué Sydney et Emily d'meuthent au Cannada nou peut quand même dithe qué j'sommes tous en Améthique, car lé Cannada — ouaithe qu'un tas d'monde n'lé rêalisent pon — est partie d'L'Améthique du Nord. J'sommes quatre dé nous (Sydney, Fraînque, John et mé) en d'ssus d'septante. J'en ai huiptante. John, comm mé, est veuvi. Sa femme fur la preunmiéthe à mouothi dans nouot fanmille pour bein d's années, et nouot' soeu Elsie n'vêtchut pon longtemps auprès lyi, et né v'là l'temps tch'arrive tch'i faut s'attendre tch'i' y'en étha d'aut' dé nous l'avant à nous. Ch'est l'sort dé la vie, et i' n'y'a rein d'pus cèrtain dans l'Monde!