À l'êcole

Quand j'avais entre six et sept ans, Papa dît à Manman: "Il est temps qu'chu garçon-là âge à l'êcole!" Mlle. Mabel Maugi (pus tard Mandanme George L'Boutilyi), tch'avait c'menchi à garder êcole siez san p'pèe tout près d'l'églyise dé St. George, et ch'tait lyi tchi m'apprînt l' A-B-C.

À l'âge dé dgiex ans, Papa dît: "Lé George dév'thait aller à eune pus grande êcole. I' faut l'env'yer au collège au Haut du Mathais. J'm'en vais d'mander au janne Jean L'Cornu d' "North West View" d'l'emm'ner là auve li." I' s'adonnait qué la m'mée à Jean 'tait Wesleyenne, et mé v'là don aller à L'École Wesleyenne auve li.  Ch'tait Maît' Harry James Carter tch'était Maître, et il 'tait strict et raide pour la disciplinne. Né v'là don un coupl'ye des maitrêsses à m'êprouver pour saver dans tchi clâsse mé mettre. Jé n'savais pon grand'chose dans les chiffres, mais j'pouvais liéthe. J'n'avais pon ouï autheune aut' langue qué l'Jèrriais dévant aller à l'êcole, et j'n'apprîns pon fort d'Angliais siez Mlle. Maugi, ch'est en tchi jé n'savais pon trop bein l'prononcer mais j'pouvais l'liéthe couothamment. J'tais avanchi dans la lectuthe mais en r'tard dans l's aut' sujets, ch'est en tchi i' finnîdrent par mé mettre dans "Standard 2" à cause dé m'n âge!

Quand Papa mouothit (en 1903), j'm'en fus d'meuther siez mes Parrain et Marraine d'Aubert à La Mouaie, à St. Brélade, et j'allis à l'êcole dé La Mouaie. J'avais entre 13 et 14 ans quand j'm'en fus dans l'office à Moussieu Charles William Binet, Êcrivain près La Cour Rouoyale et iun des millieurs hommes tch'aient janmais marchi la tèrre.

J'fus nommé Commis-Vicomte en Févri 1914. J'avais probabliément eune bouannne "carriéthe" l'avant à mé dans la louai si j'avais resté en Jèrri, mais j'm'engagis dans L'Artill'lie Rouoyale dé Campangne dé l'Armée Britannique pour la duthée d'la dgèrre, et man fréthe Fraînque s'engagit dans lé "Royal Army Service Corps". Nouos fréthes Sidney George et Joyhn Giffard (au Cannada) s'engagîdrent dans L'Armée Cannadgienne.  

Duthant la dgèrre, j'eus l'bonheu dé m'mathier et l'malheu d'pèrdre ma femme. En 1916, à l'Églyise dé St. Simon, j'fus mathié à Mlle. Marguerite Adrienne Jeanne Marie Forgeard, belle-fille du Cap'taine Georges Clovis Victor Meyer, Chevalier de La Légion d'Honneur, dé L'Armée Française, et fille dé Madanme Meyer. Malheutheusement, ma femme fut frappée par la Grippe Espangnole et mouothit au c'menchement d'1919. J'ai resté veuvi. Ma fille, Reine Marguerite Georgina, fut êl'vée à Paris mais ou pâssait gentiment d's êtés auve mé en Améthique. Oulle y vînt pour bouan en 1940 dans l'temps d'la deuxième grand' dgèrre, et mathyit William Glenn Voigt, B. Sc. dé l'Univèrsité d'Illinois. I' d'meuthent à San Antonio, Texas, et ont deux êfants: Glenn Kenneth George, tch'est mathié et tchi d'meuthe à Nouvelle Orléans en Louisianne, et Carole Reine, êtudiante à l'univèrsité dé Texas.