ÎNTRODUCTION

Ouaithe qué j'aie pâssé la grand' partie d'ma vie en Améthique, où'est tch'i' faut pâler l'Angliais, j'ai tréjous pensé qué La langue Nouormande-Jèrriaise, apprînse dès mes p'tits jours siez Papa et Manman ès Landes, à St. Ouën, est la pus belle et la pus expressive au Monde. Mais dépis ma jannèche jusqu'à l'âge de chînquante-chînq ans, j'tais trop embarrassé à gângni ma vie et mett' deux-s trais sous d'côté pour souangni d'ma vieillèche, pour l'êcrithe.

En 1946, quand j'm'èrtithis d'affaithes et qué j'm'en r'vîns en Jèrri auprès eune absence dé quâsi eune vîngtaine d'années, lé Sieur Edmond Delaquaine mé fît l'honneu dé m'propôser d'être san successeur comme Rédacteu des "Chroniques de Jersey". Jé n'mé considéthais pon assez bouan êcolyi pour entréprendre pathelle tâche, et pis jé n'voulais pon m'cramponner à eune nouvelle profêssion tchi pouôrrait m'empêchi d'viagi à man tchèr content, et l'Sieur Delaquaine mé dit: "Eh bein! Pouôrrais-tu m'êcrithe eune articl'ye en Jèrriais pour mett, dans la gâzette toutes les s'maines?"

Faut bein y'êprouver, j'pensis. Au mains, v'la tchi pouôrrait aîdgi à prêsèrver l'Jèrriais — sustout d'pis qué ch'n'est qué d'l'Angliaîchinn'nie qu'nou ouait partout à ch't heu. Ma preunmiéthe articl'ye, sîngnée "George d'La Forge", man nom-d'plieunme, m'apportis des complyîments d'Fraînque Le Maistre, à ch't heu méthitouaithement Êtchuyer et Membre d's Académies d'Upsala et d'Caën. Dévant li  "Je m'arrête et m'incline" comme nous dit en Français. Il est sans autchun doute lé miyeu êcrivain d'nouot' belle et vielle langue Jèrriaise dé touos temps. San dictionnaithe en est la preuve!

Pus tard, Mêssieux A.G. Harrison et Max G. Lucas dé l' "Evening post" mé d'mandîdrent dé contribuer d's articl'yes dans lus gâzette, et chu livre ichîn est, en grand' partie, eune rédaction d'ches contributions-là , et d'articl'yes publiées dans les Bulletîns d'L'Assembliée d'Jèrriais, dé tchi j'ai l'honneu d'être membre fondateur.

J'veurs don r'corder ma r'connaîssance à la mémouaithe du Sieur Edmond Delaquaine, à Messsieux Frank Le Maistre, A.G. Harrison et M. G. Lucas pour lus encouothagement, et à touos l's anmîns tchi m'font l'honneu d' liéthe mes articl'yes dans l' "Evening post". Et, en fîn de compte, ès Mêssieux du Don Balleine tch'ont propôsé de m'honorer en publiyant chu livre, et tout partitchuliéthement à Moussieu l'Député Ph'lippe Maûgi de Veulle pour m'aver accordé s'n aîgue et l'bénéfice dé s'n expéthience încompathabl'ye pour assemblier l's articl'yes et l's arrangi en forme d'livre.

Ous allez p't-êt' trouver tchiques erreus ichîn et là. Estchûsez-les, s'i' vouos pliaît: Jé n'prétends pon aver eune parfaite connaîssance dé l' "orthographe" et d'la grammaithe dé La Langue Jèrriaise, mais j'mé console à la pensée qué l'chein tch'i' n'a janmais fait d'erreurs n'a janmais êprouvé à faithe grand'chose!

George F. Le Feuvre

Le Ménage ès Feuvres,
St. Ouën, Jèrri.
Juilet 1972.